德國國家隊隊長拿姆上周五宣佈退出國家隊，同佢一齊捧世盃嘅高路斯亦發表引退宣言，決定喺2015年高掛球靴。
現年36歲嘅高路斯喺2011年夏天由拜仁慕尼黑加盟拉素後表示，打算喺2014年退休。佢當時咁講：「如果一切順利，我希望可以喺拉素踢到2014年，之後踢埋個世盃就掛靴。」周日，佢終於有決定，向德國《圖片報》表示踢多一季就正式結束職業球員生涯。佢話：「我決定喺2015年退休。」呢位前雲達不來梅同拜仁慕尼黑射手啱啱先同拉素續約1年至2015年夏天，換言之，佢玩埋2014/15球季意甲，就會同球迷講再見。

普多斯基疑玩爛世盃

今夏巴西世盃，高路斯幫德國入咗兩球，取代巴西名將朗拿度成為世盃決賽周史上入波最多嘅球員，又幫德國自1990年後捧世盃，登上足球事業嘅最高峯，所以啲人都估佢會喺短期之內光榮引退。德國嚟緊會冇咗拿姆同埋高路斯，但好彩佢哋人才輩出，教練路維手上大把貨，故此球隊嘅戰鬥力唔會因此而打咗折扣。
另外，德國《圖片報》日前爆料，話個世盃冠軍獎盃大力神盃俾德國玩爛咗。據了解，德國喺贏咗世盃後，有人興奮得滯，將隻價值1,000萬歐元嘅大力神盃跌落地下，搞到個盃身有一個小缺口。消息亦得到德國足總會長尼爾斯巴赫證實。佢咁話：「隻大力神盃係有個地方有缺口，不過大家都唔使咁擔心，事關我哋經已搵咗專家嚟對佢進行修復。」
肇事者估計係班國腳，當中以效力阿仙奴嘅普多斯基嫌疑最大，事關佢成日攬住隻大力神盃唔放同舞嚟舞去，而且仲試過單手拎盃；若然真係佢嘅話，唔知德國足總使唔使佢找咗條維修費呢？