阿仙奴周四晚喺歐霸盃E組第四輪分組賽，主場0:0賽和尾段打少個嘅士砵亭。雖然兵工廠順利提前兩輪晉級淘汰賽，但就因為前鋒韋碧克重傷而蒙上陰影。

事發喺上半場25分鐘，當時阿仙奴後衞列治史迪拿傳中，韋碧克跳起頂頭槌後，落地嗰陣右腳足踝嚴重受傷，隨即有多達10個救護員衝出嚟睇住韋碧克，呢位27歲前鋒其後更需要用氧氣罩，並且要以硬板固定受傷位置，先至可以被人用擔架抬離場。

曾經喺曼聯同韋碧克做過多年隊友、𠵱家效力士砵亭嘅拿尼其後走上前安慰呢位英格蘭前鋒；至於今場冇被列入大軍名單嘅阿仙奴中場奧斯爾，亦喺個人twitter出post祝願隊友早日好番。韋碧克周四先至入選英格蘭領隊修夫基最新嘅代表隊名單，今次受傷肯定又要令佢被逼退隊。

阿仙奴領隊艾馬利賽後就認為韋碧克係右腳足踝骨折，仲話：「今晚最壞嘅消息係韋碧克受傷，我哋認為今次係一次嚴重嘅傷患。韋碧克嘅足踝應該有骨折，佢𠵱家已經喺醫院，目前我哋只可以繼續等，遲啲先會有更詳盡嘅資料。」

基奧特破入球荒好「巴」閉

至於另一支倫敦球隊車路士，就態憑住基奧特一箭定江山，作客以1:0小勝巴迪，同樣提早晉級。基奧特呢個入波唔單止係佢喺新帥沙利麾下嘅開齋波，更加打破自己近800分鐘嘅入球荒。今場之前基奧特最近一次破門，已經要數到今年五月喺英超對利物浦入嗰球，兩個入波相隔足足成794分鐘。

基奧特今夏曾經代表法國踢世界盃，球隊最終雖然贏咗冠軍，但呢位法國國腳踢足七場，冇波入不突止，就連一次中框射門嘅都冇。