當年今日
關於我們

唔怕蝕底 - 左丁山

蘋果日報 2002/01/09 00:00


賓架T到中環交易廣場會所出席宴會,侍應上菜速度慢幾拍,每道菜差唔多相隔超過十分鐘,但係收碟就好有效率噃。
一位年輕女侍應見枱上有一碟冇人食(因為一位人客臨時冇到),居然講:「有冇人要呀,要收碟喇!」在座成班資深賓架為之彈起,佢哋之中,有人出入北京人民大會堂食飯,邊度受得呢啲說話呀!
不過大人有大量,賓架T好有涵養,只係回應一句:「收啦,收啦。」換轉係左丁山呢類仍有火氣嘅人,大概會回應一句:「你收番自己食啦!」
賓架T話:「大概係散工,冇訓練之故。」其實散工唔係藉口,酒店界逢有宴會就請散工,服務唔對辦,就賴啲散工;大佬呀,既然畀錢請夥計,酒店會所都要訓練吓佢哋啫,冇理由等啲散工落五星級大酒店裏面㗎。賓架T同左丁山近年來都在酒店、會所見慣散工啲散漫,說話粗心,皆為香港式服務擔心。
酒店餐飲業固然要訓練散工(譬如兩個酒店業協會聯手合辦課程),散工自己亦應該自求進步,向日本工人嗰種敬業樂業態度學習,自動自覺地提高自己水平。成日埋怨呢行嗰行冇前途,抱着做一日和尚敲一日鐘態度嘅,一定成世冇前途,永遠做散仔。賓架T年輕時做見習主任學數銀紙都俾阿頭鬧冇用,根本冇人肯教佢嘢,佢自己一路做一路留心工作流程嘅竅妙,逢親老細吩咐,就算唔關佢事嘅,仍然照做,唔怕蝕底;年輕人千祈咪以為呢種態度已經過時兼老套呀。