【收市閒情】國泰那單刁 惹怒我的金融界朋友:公平咩?(千頌C)
國泰
6月9日本來係抗暴之戰一周年,結果港府破天荒動用「土地基金」bailout國泰(293),令全港焦點落咗去「因航會唔會變黨航」度。
6月9日本來係抗暴之戰一周年,結果港府破天荒動用「土地基金」bailout國泰(293),令全港焦點落咗去「因航會唔會變黨航」度。今次單刁開出來嘅條件,事實係惹來金融界少少騷動。
金融界、細價股界打滾N年嘅朋友R神,一見份通告,就忍唔住text嚟,「今次單刁都好PK,11供7呢啲咁PK嘅盤口,點會批得出?」係,的確PK,11同7呢個組合,前後都係質數,就係傳說中嘅「質數供股大法」,一般見於細價股用於質死散戶,估唔到今日,再由一間自二戰後創立,逾70年歷史嘅巨企去做,冇話錯嘅,肉酸囉。
我咁答,點知R神就仲躁咗,「咩冇錯呀!梗係錯!聯交所同證監會,近呢兩年都唔畀人供到有碎股,仲要好多時都只係畀你1供2,其他都唔點批。今次國泰打到咁碎,仲要折讓幾乎一半,揸得少嘅小股民,如果唔供真係渣都冇,好X過份,你12供8都好啲呀,係要用咁衰嘅數,畀國泰去恰小股民?」
國泰錯了,錯在佢有特權,可以玩無良供股財技,但其他公司就要俾人ban。就好似過去一年,大家嘅經歷一樣,一般人就要被嚴正執法;但只要有特權,就可以堂而皇之為所欲為。7.21拉咗人未?8.31有人要負責未?警暴問題有人要受懲處未?全部都未。「係呀!仲有國泰發輪畀政府,行使價又係4.68元,一樣折讓近一半,咁即係政府第日可以半價增持。明明證監早幾年先出過份consultation paper,話唔鍾意公司大折讓發輪,而家國泰又得,公平咩?」
你可以說,「國泰大得不能倒,大家要容忍,證監對佢特事特辦啦,佢執咗點算?」;問題就喺度,香港而家出現嘅矛盾,正正係「特別的人可以特事特辦」。
至於會唔會變黨航,正如之前寫過,國泰出事,對國航來講係一個好嘅時機去食大啲。你又可能會話,「今次都係政府出手,唔係國航呀,國航股權比例仲少咗。」即係咁,如果今次真係國航出手,家陣風頭火勢,如果俾英美視國泰係國企,就真係出事;而家留一手,擺兩個所謂「觀察員」先去董事局會議,鋪定路,都唔遲。