【收視女王地位不保】徐仁國新劇超前孔孝真
孔孝真徐仁國收視
韓國一向有「收視女王」之稱嘅孔孝真,近日同趙正錫和高庚杓主演嘅新劇《嫉妒的化身》,開播時成績算唔錯,一直都保持住收視冠軍寶座,不過噚日播出第20集,收視就終於被徐仁國嘅《購物王路易》超前。
事實上,徐仁國嘅新劇憑住口碑,收視一直慢慢上升,由開播嘅5.6%收視一直升到雙位數,直到噚日一集,《購物王路易》亦以10.5%收視力壓《嫉妒的化身》嘅10.2%收視,成功踢走孔孝真,成為水木劇(逢周三及周四晚播出)嘅收視冠軍。
至於金荷娜同李尚允主演嘅《通往機場的路》就繼續以9.3%收視包尾墊底。