周焯華去年底與女友MandyLieu世紀一拖，令正印陳慧玲心死搞離婚，洗米華亦公告給Mandy名份，「爭米戰」終露缺口。洗米華揀定Mandy，Mandy更火速再懷「華種」，更盛傳今胎生仔，連同去年5月誕下的囡囡周願，兩年抱兩，湊夠一個「好」字。至於洗米嫂就活躍搞果汁及茶餐廳生意，自力更生，各有各新生活。

昨日有報道指Mandy在上周在倫敦已誕下B仔，洗米華在倫敦陪產數天後就返澳門處理生意，指他不時對身邊友人透露喜獲「慈姑椗」。不過，據可靠消息指，Mandy確實身在倫敦為生B作準備，不過預產期將會是本月底至6月初，所以B仔尚未出世。

Mandy今胎亦效法上一胎，會以水中自然分娩，而地點就應該不會在之前的貴價醫院ThePortlandHospital，屆時洗米華當然會飛倫敦陪產。由於今胎陀仔，Mandy與洗米華都十分興奮，她已幫腹中「米仔」照過4D超聲波，她身邊友人指「米仔」五官似媽咪的混血輪廓。對於Mandy於上周在倫敦生B報道，本報曾向她的經理人求證，回覆例牌否認：「唔係事實唔回應，未收到通知。」而洗米嫂對於Mandy將生B仔的新聞及簽紙離婚一事表示：「唔回應。」

自世紀一拖後，洗米嫂決心與洗米華離婚，不過有指期間多次傳出洗米華拒簽，希望有彎轉復合，繼續左右逢源。本報收到消息，洗米華已於月前簽字，並辦妥離婚手續，回復單身，為歷時兩年多的「爭米戰」劃上句號。而Mandy產子後，亦將順理成章榮升「新洗米嫂」。洗米華最近已報署逐步給Mandy名份，早於今年2月，就帶Mandy及囡囡去泰國，同Mandy友人過年及情人節，之後再飛日本及韓國滑雪，而他為安頓Mandy在倫敦安胎，近兩個月已密密做空中飛人，來回澳門、香港及倫敦三地，平均一個月有一半時間留在倫敦照顧母女，及為BB買定用品準備。

洗米華將於下個月底，安排Mandy及一對子女返港，選址港島南區搵大屋築愛巢。雖然Mandy成功奪米，但坐正仍有阻力，皆因周家上下，包括洗米華爸爸及家姐力撐Heidi，故Mandy極可能要靠慈姑椗作為融入周家的契機。不過據洗米華朋友圈透露，他因不想父親不開心，依然未動筆簽字。