【打吡王者有回報】呂健威今早入倉 親餵「金鎗六十」開餐
蘋果日報 2020/03/23 11:57
何澤堯呂健威金鎗六十
「金鎗六十」昨日（22日）勝出今屆打吡大賽，不論練馬師呂健威、騎師何澤堯和馬主陳家樑都是華人，成就了香港賽馬史上首次全華班贏打吡，名留青史。
但創造歷史真係唔易，呢幾日呂健威當然緊張，現時贏完打吡，總算鬆一口氣，昨晚佢都話自己瞓得好好。
今早（23日）呂健威一早入倉，當然要獎勵一下金鎗仔啦，攞住一盆紅蘿蔔餵佢，金鎗仔食得好滋味。
由於現時馬會已暫停馬主入倉探馬，馬主陳家樑不能入馬房探望愛駒，就唯有靠呂健威代勞獎勵多啲金鎗仔囉。
至於「金鎗六十」經過連場戰役後，現時正好好休息，雖然此駒已報跑4月26日舉行的一級賽女皇盃和冠軍一哩賽。
昨日馬主陳家樑和騎師何澤堯都話匹馬跑1600米會比較好，睇吓最終呢匹有機會成為今屆馬王的戰駒，是否選跑冠軍一哩賽啦。
呂健威今晨入倉睇金鎗六十（呂健威提供）
呂健威準備餵金鎗六十食紅蘿蔔（呂健威提供）