當年今日
關於我們

轆Book:
F1夜戰獅城 追車望頸都痛埋

蘋果日報 2008/09/30 00:00


新加坡初辦F1賽事,仲要係史上首次夜戰,全球矚目。政府出錢出力催谷,打晒算盤話旅遊收益超過5億港元!獅城周街F1海報同相關產品,市民熱血沸騰,買唔到飛入場都要逼喺圍欄望番夠本,不過賽事跑61圈,架架F1平均車速超過157km/h,我不斷擰頭追車望,最後搞到頸痛收場。

直擊記者、部份攝影:梁美甜
協力:徐影龍
鳴謝:MotorImage
賽區附近築起好多圍欄,摩天輪、濱海藝術中心、RafflesHotel跟往常不同,瀰漫住一股大戰將近嘅氣氛。沿途旅客不但無抱怨圍欄阻頭阻勢,反而見到好多人刻意低炒,務求將賽道同圍欄收入鏡內,都幾好笑。
就算離開賽道心臟地帶SuntecCity,去到邊都仲感受到F1;朝早麵包舖有F1朱古力卷新鮮出爐,麵包做車身、朱古力做四條胎、忌廉做車手,睇見流口水;晏晝落VivoCity閒蕩,坐的士見車櫳貼滿F1傳單,司機大佬好熱情咁問我係咪嚟睇F1,仲問我知唔知點解街賽要掉轉跑呢?係喎,逆向刺激啲啩?錯!原來係防止車手提早熟習賽道,又或普通司機心癮起時扮F1車手。
empty
■練習賽舉行時仍未入夜,黃昏美景下別有一番味道。
empty
■為將黑夜打光,特別加設1,500個特強射燈,電纜總長108,423米!
empty
■場內場外都咁熱鬧,離遠聽到引擎聲,會好一致咁追住望。
睇到嘩嘩聲
上個禮拜六,F1車手首次落場自由練習,未入夜附近已擠滿人,未見過新加坡會逼過旺角,官方估計有10萬人入場,仲未計買唔到飛喺場外啄啄吓嗰班。
圍欄外逼滿人,個個擒高踎低霸靚位,人人情緒高漲,嘈到我連電話都傾唔到,點知一架F1飆過,震天引擎聲蓋過現場噪音,人人High到嘩嘩聲,第二架經過又嘩一輪,情形就好似睇流星雨咁,加上F1跑得實在太快,平均車速超過157km/h,根本睇唔清係麥拿侖定法拉利,大家個頭只係不停快速由右至左咁追望架車,最後引發我頸痛舊患,望一輪已經頂唔順要唞唞。
empty
■坡妹不惜隊部手機入欄柵內,務求影到F1疾飆風姿。
empty
■近濱海藝術中心位置,一眼望晒由十字路分割出嚟嘅兩個急彎。
empty
■坐喺全球最高嘅摩天輪上俯瞰F1,跑車恍如一列急爬中嘅蟻。
empty
■F1朱古力卷好得意,約港幣$8,又唔貴喎!
馬沙之反擊
車迷瘋狂,相反F1車手叫苦連天;賽前法拉利車隊王牌馬沙(FelipeMassa)批評獅城賽道,認為街道狹窄、直路唔夠長,比西班牙Valencia站更難超車,而且經常緊貼前車,會失去氣流造成嘅下壓地,大大減低咬地性,其他車手亦狠批10號彎路肩有問題。
法拉利車隊早前連番失利,有傳新設計嘅F2008有問題,令馬沙多次飲恨。上周六關鍵排位賽,馬沙攞到排頭位出戰機會,可惜到周日正式出戰,馬沙太黑仔,入Pit時綠燈錯亮而提早開車,拖住條油喉幾十米先識停,被大會罰10秒,最後連隊友KimiRaikkonen都喺第57圈時失控炒牆,法拉利獅城之戰零雞蛋收場。最後反而由排位賽兩度失利嘅雷諾車手F.Alonso奪冠,第2名係威廉士車隊嘅N.Rosberg,季軍則屬麥拿侖車隊嘅L.Hamilton。拉利隊只攞到13及15名,車隊總成績輸1分畀麥拿侖排第2。
empty
馬沙(法拉利車隊)
empty
■頭頂有大光燈射住,後勤人員要喺大陰影下快速工作。
empty
empty
■F1車手認為路肩太高,炒埋去架車好易玩完。大會從善如流,將最受非議既10號彎路肩削平。