張繼聰今日應演藝學院師妹黃懿雯邀請，到港台接受節目《新文化運動》訪問，分享吓喺演藝學院時趣事，眨眼已畢業咗16年，諗番當年正值反叛時期，佢笑住話:「依家諗番起，當時都冇做過啲乜嘢驚天地嘅反叛事。可能因為中學好似監獄式，要好乖，到去演藝嘅時候學費又貴，最多都係點完名之後，同白只走下堂。」

回味青葱歲月，亦係拍拖年紀，好多時一大班同學去唱K，梗有一兩個唱到喊，但自己冇份喊。阿聰指演藝學院階段影響自己好深，亦認識到好多好友如白只、王祖藍等，彼此一齊喺呢個圈嗰度努力。演藝亦有個傳統就係師兄師姐會特別照顧師弟師妹。已經讀緊中學嘅大仔張瞻喺校內都有戲劇課，阿聰話:「 佢都鍾意上嘅， 若果將來佢有興趣演戲，我會先令佢明白係做演員而唔係做明星，演員係艱辛好多，不過依家佢最想做係youtuber。」

精選娛聞，喺晒《娛果》
http://fb.com/appledailyent