【李八方online】被制裁林鄭「驚現」美國talk show 遭寸爆似「癲婆」
蘋果日報 2020/09/10 00:58
李八方online林鄭Conan O’Brien
特首林鄭月娥話唔怕被美國制裁，聲言都唔去美國，有「手足」就幫佢「偷渡」赴美，感受一下自由空氣。
受到武漢肺炎疫情影響，美國著名搞笑主持Conan O’Brien喺TBS （電視訊道）嘅晚間清談搞笑節目，冇得請現場觀眾，結果佢請15,000名觀眾喺網上提供肖象圖片，等佢可以用卡紙印出嚟做「現場觀眾」，最終多達270個「現場觀眾」可以同Conan喺台下交流，唔知Conan時運高，抑或同777近日最愛講嘅「居心叵測」有關？Conan同其他「本土觀眾」交流後，竟然眾裏尋她見到「林鄭」——仲要係去年9月喺電視節目中宣佈撤回送中惡法、木無表情嘅「林鄭」。
Conan嘅拍檔見到777呢位「海外貴賓」嘅尊容，暗諷佢似癲婆（she doesn’t look like it but she is nuts）；Conan一邊「握實」林鄭，一邊話有呢種神情嘅人，正正係佢平日主持節目時最常有眼神接觸嘅現場觀眾，笑言「我都經常好奇點解佢哋要出席呢類節目？點解會嚟享受搞笑節目？」，直指777個表情「睇嚟想判人死刑咁（look like you’re here to pass a death sentence）」。
Conan一邊「握實」林鄭，一邊話777個表情「睇嚟想判人死刑咁」。網上截圖
笑777表情「睇嚟想判人死刑」
Conan之後仲帶埋777上台，話有時如果觀眾唔太享受佢嘅節目，帶佢上台交流後情況或有改善，仲問大家「佢（777）個樣有冇睇落開心返啲？」拍檔即時搭嘴話777副尊容似唔想借錢畀Conan咁，令Conan都忍唔住笑咗出嚟。
Conan之後仲帶埋777上台，問大家「佢（777）個樣有冇睇落開心返啲？」網上截圖
到底Conan知唔知林鄭係乜水？有網民話覺得Conan似乎唔知恥笑緊嘅人係香港特首，叫佢要小心被香港國安拘捕，亦有人話Conan一定知道777係乜水，因為佢向來關心香港情況，過去曾經喺節目中恥笑港警控告女示威者「胸部襲警」一事極荒謬。
八方就留意到，唔少美國觀眾都認得林鄭，紛紛留言話係香港特首、推出「港版國安法」，亦被美國制裁，似乎美國人真係好留意香港局勢發展。香港網民則關注，林鄭知法犯法，公然「勾結外國勢力」，國安公署仲唔做嘢？向來關心國際戰線嘅前香港眾志秘書長黃之鋒亦喺Twitter分享呢段短片，話777呢個北京傀儡，已經成為國際笑柄。
-----------------------------
《蘋果》英文版免費試睇：了解更多