韓國水木劇(逢周三及周四播出)自從《太陽的後裔》播出之後，之後就由《GoodbyeMr.Black》做收視冠軍，上周首播由黃靜茵及柳俊烈主演嘅《好運羅曼史》一推出即搶贏咗做收視冠軍，點知前晚一集就被池晟同惠利主演嘅《戲子》搶咗收視寶座，《好運羅曼史》變成做阿二。

估唔到噚晚水木劇收視又再重新執牌，當大家以為收視冠軍會由昔日好拍檔黃靜茵嘅《好運羅曼史》大鬥池晟嘅《戲子》之際，由千正明主演嘅《麵條之神》就冷手執個熱煎堆以8.6%成為收視冠軍，至於《好運羅曼史》就有8.2%收視，排第二名，而《戲子》就以8.1%收視墊底。

《戲子》前日一集先首嚐做收視一哥滋味，估唔到話咁快又被《麵條之神》搶咗收視寶座，睇嚟下周水木劇嘅收視又會掀起一番爭奪戰。