今年33歲的王梓軒，來自富二代家庭，父親是藝術發展局主席，在美國長大的他，擁有雙學位。09年入行，王梓軒由歌手身份開始，其後在大台任清談節目主持，又拍電視劇，逐漸為人認識。12月中，他開第二次個人演唱會，以為十年是一個里程碑，他卻道出自己的十年故事。

「喺呢十年裡面，我諗比較大的迷惑或者挫折，至少都有三次，而細小嗰啲就每日都可能發生，唔使多講，但嚴重嗰幾次都有不同朋友陪我共渡過。例如初出道時，好幸運可以同日本公司Avex簽約，當時直情飛到日本生活，喺當地學日文同出碟。但不幸地，唔係我不幸，而係日本人不幸，當時發生311大地震，日本人有種團結精神，就係段時間，所有人一定尊重傷者，或者受影響的朋友，所以停止所有娛樂事業，無演唱會，無出碟、唔拍mv，所有工作都暫停。當時啱啱出道，有一首單曲，亦有一班同事，睇住一班同事逐個離開公司，剩低我一個人，所以當時回流香港。」他說。

當時是出道第三年，因為離開了一段日子，本來唱片業已經走下坡，再回歸，巿面上已經沒有唱片這回事。

「我考慮係咪應該繼續，抑或轉行，但一個機緣，我有機會加入電視台做《兄弟幫》嘉賓主持，做咗幾十集後就坐正變真正主持，由唔習慣自覺表現勁差，到真正享受，有觀眾特登話我知，我喺節目中帶出一啲好好信息，好多謝我，我覺得好開心，重新搵到自己。」他說。

有突破，王梓軒卻又對自己有懷疑。

「12年開唱會後，有兩大發現，其一係從事音樂真係好困難，其二係電視方面開始多機會，所以就硬着頭皮，自己唔係好識，好習慣，甚至身份上都有啲唔認同自己，即係我明明係歌手，點解唔係唱歌？有得拍劇同主持節目，呢啲都係機會，但我只顧把握新機會，然後就忘記初衷，咁樣係咪唔係咁好呢？」他同時又不得不面現實：「當時做電視、拍劇都比較穩定，帶嚟曝光率，同埋出騷機會增加。有幾年差唔多接近九成時間係拍緊電視劇同電影，我記得大概三年時間內拍咗十套電視劇同電影。」

曝光多了，同時有機會參加國內的大型創唱人歌唱節目，不過工作量太多，未有時間準備，第一次未能入圍。當第二次機會來到，他不想錯失：「嗰次我終於入圍，煞後去到隊制三強，成績算唔錯，繼後亦都有好多音樂表演。但出碟又好困難，其實我仍然要做影視，先可以保持穩定收入同工作，好彩松哥畀我一個好大啟發。」

原來當其時，他跟汪阿姐、劉松仁拍《華麗轉身》，兩人不時傾偈，松哥給了他強心針：「佢話不如同我訂一個三年之約，三年之內要合作，我覺得你有潛質。之後就出現咗《利瑪竇》舞台劇。就係因為舞台劇，畀我一個新方向，我不斷問自己，究竟係歌手定演員？但我發現呢個問題係愚昧，點解要界定？舞台劇話我知，唔識唱做唔到，如果無磨練過演技，根本溝通唔到，好感恩每次跌都無停低，又係又一條好漢。」

開完演唱會，王梓軒要馬上做第二度公演的舞台劇《利瑪竇》，唱意大利歌劇，一口氣講連串對白，難度頗高，不過他卻很享受。誠如他所言，十年磨劍，原來也不過是一個真正開始：「有人會話十年係一個里程碑，我曾經幻想第一個十年有咩成績，但原來十年只係一個開始，今年三十三歲，先至叫學識一啲最基本要識既嘢。之前識得發夢，但唔識得執行，而家有SKILLS，有啲人脈，有啲真心朋友，咁樣先可做大事，再向高處望。

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難！】

親臨旺角做升級壹會員，即送「香港人：抗爭之夏」限量明信片

詳情地址