衛蘭（Janice）同鍾舒漫（Sherman）今朝去到沙田參與香港麥當勞叔叔之家2016開放日暨成立20週年誌慶，更見證大會籌備興建第二間麥當勞叔叔之家。

6年前曾到訪嘅Sherman仲記得嗰次探訪心情緊張，唔知道點樣同患病小朋友溝通，有咗上次經驗，今次已經同小朋友打成一片，因為佢哋都係想得到開心同關懷。Janice踏入麥當勞叔叔之家後，覺得嗰度可以畀患病嘅小朋友同家人一份好大安全感，有助病情可以盡快康復，問到Janice探訪時會否容易眼淺？佢話：「都會，每次探訪時都會自我檢討生命，好感恩自己有健康身體，都想呢度小朋友快啲好番。」

聖誕節將至，Sherman最近喺銅鑼灣開設短期咖啡小食店，佢話：「以往聖誕節都會諗點約朋友搞派對慶祝，今年會諗吓創作聖誕特色小食放喺舖頭賣。」另外，Janice會同杜德偉到美國登台，亦係佢首次於聖誕節出外登台。