黃翊現時身兼幾職，做幕前、大排檔老闆、父母職在身，與陳存正育有一子Wesley（黃睿），今年12歲。

太太近年患有腎病，黃翊要兼負母職，搵食之餘也要顧及家庭及太太狀況，有一定壓力，但大埔三小姐生意亦忙得不可開交。有時黃翊分身不暇，會搵囝囝落場幫手；但因為囝囝年紀仲細，學業為重，所以黃翊唔會動輒出「王牌」。

試過有次踢晒腳，嗌囝囝幫手：「佢會驚同唔鍾意。有次佢玩game，要金幣，我就同佢講，幫爸爸手，就資助你買game，佢即刻應承。」在旁的Wesley聞言就話平日鍾意畫畫、打機。訪問期間，他一直在畫啊畫。

是日Wesley跟爸爸一齊開檔，學吓執枱擺位基本工，學吓點樣招呼客人。一次過攞筷子碗杯再斟水，對Wesley嚟講，零難度。擺好晒位，黃翊再教囝囝：「記得之後要好有禮貌咁講：『各位請慢慢享用，畀多啲貼士。』」作為家長，黃翊很重視小朋友要有禮貌：「阿仔放學返嚟會『Hi！』，我唔係咁鍾意，同佢講應該係『Hi爹哋！』有一個稱呼，佢都要改善。」

跟爸爸落單，Wesley記唔切，以畫公仔取代菜式名，又即場畫咗隻小貓咪送俾爸爸，黃翊冧爆：「叫做及格啦！好期待今年阿仔同媽媽嘅手作禮物，希望有驚喜。」黃翊最難忘收過囝囝整嘅卡寫上「No.1 Dad」，令他好窩心。Wesley就讀國際學校，一口流利英語，黃翊和太太只盼望兒子視野闊啲，此外已無所求。

近年黃翊復出幕前，Wesley也開始懂事，於是黃翊就跟他說，「爸爸以前做過歌手㗎！」有時會帶埋囝囝開工：「話俾阿仔聽，爹哋唔係流㗎！」他笑道。太太都係參加音樂比賽入行，Wesley遺傳了父母的音樂細胞，學吹色士風一段時間，音準、拍子準，歌喉也不錯。黃翊補充：「不過唔會迫佢做任何嘢。」

說到太太的病情和家慮，黃翊說，壓力一定有，勝在樂觀面對。「太太身體唔好已經一段時間，都習慣咗，有腎病要洗腎，目前穩定咗，精神咗，覆診指數都好咗。我哋比較樂觀，大家一家人去面對，樂觀對病情都好。」Wesley也很懂事，唔會激陣媽咪，兩母子平日相處時間較多，黃翊通常每日只可以見到囝囝再攬一下，星期六日一家人喺鋪頭食早餐，傾下偈，他說：「覺得太太了解兒子多過自己。」

父親節，黃翊說要開工。「做大排檔，父親節都要返工。我哋冇咩父親節母親節，平時一家人一齊食早餐、食午飯已經好開心。當然囝囝都12歲，都會諗唔使提佢整份禮物畀媽咪爹哋喇，到時會有驚喜㗎啦。」Wesley就故作神秘謂：「唔講得整乜嘢禮物，當日先知。」

採訪：卓寶花
攝影：林德雄
片段：廖達燊

相關文章：
【爹哋=萬能俠】妹妹Sukie向父求婚 鍾舒漫自嘲在騙案中成長
https://bit.ly/2JQjfuV
【父子道場見】成日叫個仔搬 72歲夏雨感觸：人老咗好麻煩，要人照顧…
https://bit.ly/2JG9O1O
【微動画】愛要及時 別讓父親節留憾
https://bit.ly/2JMU7Gp
【15歲仔拒攬錫】55歲硬漢錢小豪：我一早預咗有被遺棄嘅感覺
https://bit.ly/2K0k0l2
【前妻改嫁兒子改姓】錢小豪父子分離逾20年：想儘量修補番
https://bit.ly/2lgCu2S
【54歲初為人父】與歲半兒子天天歷險 杜德偉驚覺：爸爸以前都係咁整我
https://bit.ly/2JKihRw

精選娛聞，喺晒《娛果》
http://fb.com/appledailyent