【壹界草文】最愚蠢的AA(林雨菲)
林雨菲
街霸出手打人固然愚蠢,但自幹醜事仍不知,還自行把醜事傳千里才更愚蠢。
疫情震死各行各業,租客搵頂租都已經走投無路,經紀殺價就唔好殺雞取卵咁無良。事源有個租客租緊由發展商持有的一個寫字樓單位,疫情嘛,生意難撈,咪搵人頂租。人衰行路打倒褪,識着經紀F,以為畀比平時多1倍的2%佣金,可以換來生路,卻……
經紀F來自一間小型地產代理行,本身有個租客搵緊寫字樓,有供有求,就將上述嗌晒救命的業主頂租介紹畀佢。不過,新租客對於單位的內部裝修及傢俬要啲唔要啲,雙方就要舉行會議。出席會議有發展商代表、原租客,以及經紀F,雙方就交收單位的內部裝修是否完全還原為清水房而增持不下,這一刻,經紀F就跟原租客說:「老老實實,你都走投無路先要搵人頂租,佣金你就梗係要畀足啦,其他條件都要遷就我個客,收樓嗰日你仲要開本票比足佣金我,你知啦你哋公司搵人頂租即係唔掂啦,如果收樓嗰日你唔係用本票支付佣金,我係唔會帶個客嚟租你個單位。」發展商代表查實想以和為貴,但經紀F跟他說:「如果呢個租客唔畀佣,係咪你負責啊!」原租客就範,經紀F不單只回到公司跟同僚耀武揚威:「我一個人喺會議壓晒場,業主代表同埋原租客,嗲都冇得嗲!」此話還其他行家自吹自擂。
實情如何?事實上,發展商代表深明「爛佬怕潑婦」,而且和原租客關係不俗,是想放原租客一條生路,然後安排他到旗下非核心商業區承租一個較原先寫字樓細三分一的地方,讓他捱過難關。到取佣金那天,經紀F按原定時間早上10時到原租客寫字樓,原租客說忘記帶票,叫經紀F去食個午飯。食完回來,原租客已不在公司,秘書說:「老闆仲未簽名,你喺會議室等一陣啦!」一等,等到黃昏五點半,公司關門,秘書按老闆意願,把佣金支票交到經紀F手上。佣金按原定2%,是為76萬元,的確,話多唔多,話少唔少,但發展商已將她列入「刁難」名單,從此難會再開單。世上最愚蠢的AA不單是打爛自己飯碗,而是幹了醜事而不知,還要自己把醜事傳千里,傳到筆者來轉載。經紀做緊的不是交易,而是關係,願天下經紀朋友,共勉之。
-----------------------
屬於香港人的移民攻略
立即登入
【全球樓行】 Dream House零距離