黃宗澤(Bosco)呢排忙拍大台劇，噚晚喺中環街頭，同其中一個力捧小花劉佩玥(Moon)拍一場嗌交戲，當時大概9點幾，Bosco未埋位時就喺附近名店windowshopping，狀甚輕鬆，反而Moon就好凝重培養情緒，吸引唔少途人喺度用手機影相。

着住桃紅色連身裙同黑褸打扮嘅Moon就喺商廈走出嚟，追住Bosco道歉，一路講一路喊，又捉實對方手臂等，Bosco一啲都唔領情，仲拂袖而去，冇理阿Moon。成個過程，Moon食咗幾次NG，當拍到Bosco唔理佢走咗嗰幕，佢仲雙腳跪晒地下嚎哭，都喊到好大聲，直情喊到收唔到聲，就算停機NG，有工作人員幫佢整理頭髮時，佢都繼續喊keep住情緒，都幾入戲，喊起上嚟仲幾分似杏兒，唔知Bosco覺唔覺得好親切呢！