【夾埋㗎?】老公前度譏張雨綺「精神失控」 舊愛汪小菲貼恩愛照
汪小菲張雨綺袁巴元葛曉倩
憑周星馳電影《長江七號》上位嘅31歲大陸女星張雨綺,有指佢中秋節當晚同老公袁巴元先口角後動武,最後仲持刀劃傷老公,搞到要去派出所過到中秋。報道中,張雨綺否認持刀(相關新聞: https://bit.ly/2ORDFmC )。
雖然事發至今,張雨綺兩公婆都冇作出任何回應,不過佢嘅前度汪小菲,同埋袁巴元嘅前度女友葛曉倩,就似乎好感觸。
先講袁巴元前女友葛曉倩,自稱係歌手兼模特兒嘅佢,曾傳為袁巴元未婚產女,不過喺2016年,袁巴元就同張雨綺閃婚,至於個女,17年嗰陣張雨綺就話由自己同老公撫養,仲話人哋個女係「婚後收獲的最珍貴禮物」。
老公又冇咗,個女又冇埋,葛曉倩百般滋味在心頭。噚日黃昏爆出張雨綺「肢體糾紛」之後,葛曉倩晚上就喺微博出post,寫道:「遠離情緒、精神容易失控的人,因為你永遠不知道她明天會拿起刀子對向誰。平安是福。更不要吹捧,設想所有人遇到糾紛都提刀或使用暴力……毀了別人,也毀了自己。」內容引人聯想。
依家葛曉倩呢個post已經唔見咗,但無獨有偶,葛曉倩微博置頂嘅post係寫住「人,貴在真實,不真實的人說的話,做的事,營造的表象,終究經不起時間的考量。」佢今早同網民「交流」時,提到張雨綺刺傷事件時,更回覆留言話:「希望她(張雨綺)不要睬我,省的被砍。」大巴大巴車埋去。
呢邊張雨綺俾老公前度狂寸,另一邊佢嘅前度汪小菲噚晚亦喺微博出post,大曬同老婆大S(徐熙媛)去度假嘅合照之餘,仲寫住「平平淡淡就是福」。的確,睇番汪小菲同張雨綺一齊嗰陣,佢兩個俾人爆鬧交時會互摑(相關新聞: https://bit.ly/2OTgisR ),其後因大S介入,兩人分手,張雨綺亦火速同大陸導演王全安撻着仲結埋婚,惜2015年因為老公涉嫖娼,最後離婚收場。
精選娛聞,喺晒《娛果》
http://fb.com/appledailyent
張雨綺於中秋節當晚同老公袁巴元先口角後動武(微博圖片)
張雨綺話葛曉倩同袁巴元嘅(右)囡囡,係「婚後收獲的最珍貴禮物」(微博圖片)
葛曉倩被網民指噚晚喺微博明寸張雨綺,不過今日呢個post就已經被消失(微博圖片)