【名家搶先睇】北水取態有改變(晉佳)
港股晉佳
港股通走資2億,係4個月以嚟首次,數字睇起上嚟不樂觀,但當中反映有啲股北水派貨,有啲股北水仍有興趣買。好似蹺蹺板一樣,A股唔得時,資金流去本地銀行股;A股得,又返去騰訊(700)、平保(2318)度,最重要係咪喺唔同時間處於大漲小回走勢之中,暫時睇,短期內答案仍然係正面,因為幾隻大藍籌嘅走勢尚算不錯。
人行噚日再進行1,000億人仔逆回購,令到淨投放達到200億,喺北水供應仍然充裕之下,除非又見到港股投資者情緒亢奮,耗盡短期購買力,否則短時間內未見到新一輪拋售嘅潛在危機。只係同一時間,有股走勢向上,又有股不斷向下潛,大部分時間以咁嘅形式去進行調整過程。有一點要留意,北水有別於上半年可以穩陣坐貨,喺估值升高咗、內地拆息反映資金成本貴咗之下,北水亦會更短視,最大買家都坐唔穩,個市冇得唔Chok。
綜合以上要點,港股呢輪唔會係個股全面上升嘅狀況,反而一見到單日隻隻股全面上升、大家high high哋仲驚,因為又到短線轉軚嘅時間。
有一個板塊,小弟對於佢哋仲未死心,就係商品股,中鋁(2600)近期有反彈,中國東方(581)又喺5.5元左右盤旋。呢個板塊暫時仲未起步,但炒作中國經濟回升嘅話,出年某個時間會相當受惠,值得備忘。
https://www.facebook.com/advanceguy1/