【後日擺酒】賴弘國甜蜜啜爆老婆 楊受成唔敢挨近阿嬌
註冊鍾欣潼賴弘國
37歲鍾欣潼(阿嬌)今日升呢做賴太,在尖沙嘴跟台灣老公賴弘國(Michael)舉行簽紙註冊儀式,英皇老闆楊受成、COO霍汶希(Mani)、容祖兒、蔡卓妍、古巨基夫婦、關智斌、鄭希怡(Yumiko)和老公梁學儲到場見證,阿嬌着deep V裙襯閃爆鑽石耳環同手鈪,性感迷人。
儀式於近5點開始,一對新人宣讀誓詞後交換戒指,賴弘國攬實老婆情深一吻,祖兒起哄大叫:「好嘢!錫多啖,錫唔夠喎!」兩人肉緊啜啜後開始簽紙儀式,由於阿嬌1歲喪父,所以由老闆楊受成擔任女家證婚人,跟賴弘國父親齊齊主持簽紙儀式,禮成後拍合照,Mani話:「楊生,挨近啲影相啦。」楊生即刻搞笑話:「我驚Michael嬲呀!」
之後一眾英皇藝人起哄跟阿嬌講:「我唔捨得你嫁呀!」阿嬌搞笑話:「我好想你哋嫁呀!」未嫁嘅祖兒就話:「嫁出去嘅水,等如潑出去嘅女。」心水清嘅阿Sa就即刻篤爆:「係咪講錯嘢呀?好似係嫁出去嘅女,等如潑出去嘅水喎!」全場爆笑。
簽紙儀式完結後,一對新人同親友拍大合照,跟住移師室內向長輩斟茶,阿嬌孖老公跪地斟茶給老闆楊受成,並由祖兒客串做「大妗姐」,飲過茶後楊受成用國語向賴弘國訓話:「你要好好對她,不好的話,你就不要來香港。」
阿嬌出嫁連番慶祝,繼5月在洛杉磯舉行婚禮,今日在尖沙嘴進行註冊儀式,後日則假西九補擺喜酒。
精選娛聞,喺晒《娛果》
http://fb.com/appledailyent