「常說鐵窗外是更大的牢獄，豈料回來後，真的經歷了無可拒抗的傾瀉滑落」，一年前，東北案被告林朗彥等13人被判入獄，各人其後保釋。一年後，林朗彥於社交平台上寫下了這段字。過去一年，眾志成員被DQ參選權利，從政黨轉型為民間政治團體，羅冠聰退下火線，林朗彥接任主席一職。面對終院審判，林朗彥未敢太樂觀，「出到嚟之後，好想捉緊啲時間佢，因為唔知幾時又要入返去」。

記者　李雨夢

在獄中，一支畫筆，也有用武之地。林朗彥去年被關押在大嶼山塘福懲教所時，重拾了久未使用的畫筆，「最初係叫人寄時裝雜誌畀我，我就畫啲Model嘅人像。本身都鐘意畫人像，同埋用嚟打發時間，畫吓畫吓，跟住就有囚友畀佢哋屋企人或者女朋友嘅相我，叫我幫手畫，再寄返出去」，透過一張人像素描，為獄中人傳達思念。

囚禁期間，家人朋友寄了大量書籍給他，那時的閱讀量前所未有地增加，最觸動他的，是劉曉波所著的《末日倖存者的獨白》，「呢本書係劉曉波嘅六四回憶錄，講佢點樣面對監禁，同埋佢嘅懺悔。作為政治犯，嗰種心境係可以令人去參照，同埋都有講到當時一啲內部矛盾，就覺得同傘運嗰陣好相似」。他在外面一個月未必能好好讀一本書，但入獄那三個月已讀了近20本書，只因在獄中「捱時間好辛苦」。

訪問過程中，林朗彥不斷提到「時間」。嘗過階下囚滋味，他對於時間的觀念起了很大的改變，「依家會覺得時間好緊迫，想趁仲有自由嘅時間做多啲嘢」。林朗彥以往在學民思潮及香港眾志主要擔任文宣設計，今年五月接任眾志主席，「自問都可以再做多啲嘢，依家會再做多啲統籌議題嘅角色，雖然嚟緊要打嘅係國歌法，但都想有更多唔同面向，同埋吸納更多年青世代去參與」。他也開始思考多一些創意方面的工作，例如拍片，跟過去做文宣設計的理念一脈相承，「希望畀人第一感覺可以好型，再去吸引到年輕人」。

林朗彥笑言從前是工作狂，會把全副心力投放在社運工作。出獄以後，女友黃莉莉提醒他要休息，林朗彥也說，要多花時間經營與家人的關係，「我爸爸係做警察，之前關係一直都唔係太好，但坐監之後，大家好似多咗一份諒解，以前會好逃避，唔鐘意返屋企食飯，成日都唔返去，但出咗嚟之後真係有多咗返去食飯」。

林朗彥受訪時未知是否需要重返監獄，「咁當然唔想坐，呢個係好誠實嘅諗法，即使想透過法庭去表達一啲理念，或者透過司法抗爭去為以後嘅抗爭者爭取多啲空間，但出面個環境其實係可以令你做到更加多嘢。我唔係好怕坐監，但會有好唔自在同唔自由嘅感覺」。