動主播出擊，節目任你Click！過去一年《蘋果動》除咗為觀眾提供新聞內容外，一班動記者同動主播亦落力製作咗唔同嘅節目，為各位帶嚟多元化節目同資訊。

財經阿Cal除咗關心大家個竇，主持《靚裝ONS》介紹特色裝修靚盤，仲關心大家嘅荷包，喺《搵錢實驗室》試做UberEat外賣仔，主持《瑞銀呈獻：股票傳心師》睇股市。財經節目仲包括專講地產資訊嘅FB直播節目《今期樓行》，好似搵嚟驗樓師詹Sir登堂入室，即場為層樓把脈驗身。趁過年又搵嚟堪輿學家柏天心師傅，為大家拆解狗年家居風水佈局。《全球樓行》走出香港，遠赴加拿大、澳洲、台灣等地，關心全球樓市。仲有2D動畫《知Jagron》教你財經通識，咁就唔會蝕底啦！

娛樂有動主播表妹坐陣，主持《一個人煮》，孖住歌手藝人炮製愛心食譜，簡直入得廚房，出得廳堂！所以，表妹夠晒資格主持真人騷《愛情DQ掣》，為一眾單身男女指引脫單之路。

副刊果籽有肥通同阿聰。肥通主持嘅《肥通測試》真係乜都試，試勻家居用品，新奇科技，唔睇你就蝕！《Gadget Guy》阿聰講iPhone講到出晒名，連Apple Store嘅職員都認出，不過阿聰就話唔好再問佢下一部iPhone幾時出，炒唔炒得起呢啲，佢係唔知㗎，唯一只係比大家快一步，攞到新機喺手！

如果你自問係大專或以上程度，有話題觸覺，計仔多多，中文唔錯，打字啪啪聲，鍾意出鏡，兼有樣巴閉範疇可以堪稱專家，又有興趣參與台前幕後嘅創作及製作各式節目，一齊度橋、搵料、寫稿、出埋鏡，成為動主播或動記者嘅一份子，就將個人履歷、自我介紹、selfie、影片作品集（如有，請上載至YouTube）及要求待遇send嚟mailto:[email protected]，等你！截止申請日期︰二零一八年三月九日