嚿年處女下海，喺銀行公會午餐會主講嘅特首曾蔭權，爆咗一句「Wherewereyouguys」，技驚四座，噚日煲呔崔護重來，同賓架繼續演繹「你班友仔去咗邊」嘅延續篇，之不過，對於近日滾熱辣嘅江湖傳聞──金管局總裁任志剛兩年後退休，同埋炒家借機炒作呢單消息，狂吸港元之作，佢就全無回應，又唔理台下畀咗錢買枱嘅嘉賓感受，只准寫紙仔問問題，冇得現場發揮。
午餐會由銀公主席蘇利民主持，佢介紹特首出場時即幽佢一默，強調銀行界今年冇掛住打golf，大家都好勤奮工作，此語一出，台下笑聲掌聲如雷。
做慣推銷員兼老細嘅煲呔，嘴巴上梗唔會輸蝕畀銀行大班，佢即刻回敬蘇利民，話好開心佢代表銀行界承諾，會努力拓展業務，「就算打golf，都會打少啲」，嗱，特首冇話你班友唔打波，係打少啲咋！

明年帶隊訪中東

講番特首嘅金句，就要倒敍嚿年4月復活節期間，人行突然公佈QDII（合資格境內機構投資者）政策，畀內地資金經銀行嚟香港投資。阿爺送禮，煲呔見銀行界冇即時反應，剩係掛住「喺泰國打golf同做spa」，當然好㷫，敲晒枱儼如阿媽教仔咁問：「Wherewereyouguys?」
今年特首施政報告提出，要打造香港成為伊斯蘭發債中心，煲呔噚日就喺午餐會爆響口，話打算明年初由佢親自帶隊，率領金融界走訪中東，拓展商機。嗱，上次各位賓架冇去中國敲門，今次就好book定機票去中東喇！
mailto:[email protected]