當年今日
關於我們

【棟析先機】試閘拍新勝馬從容不迫 韋達勢幫第三匹處女馬出頭(陳華棟)

蘋果日報 2019/09/10 22:30

陳華棟棟析先機

香港馬迷一向有一個通病,就係騎練嚟港後唔能夠及時交到成績,就會被踩到地底泥。好似希威森騎埋啲下風馬,輸都畀人話佢渣又夠唔公平!我有個南非人老友記睇過佢老哥跑馬,佢話騎功響杜美爾之上,有呢個評價,大家可以計下數。
跑馬唔係跑人,殿堂級高手魏德禮就最清楚,佢響七十年代尾曾經去日本客串,但當年既日本馬圈仲係好封閉,所有好馬都留番畀本地騎師,魏德禮連騎二線馬既機會都無多,騎著呢啲下駟,騎快三個馬位都輸畀人啦,所以佢只係客串咗短時間就雞咁腳走人!
繼續介紹三匹心水,首先有頭場「夢幻戰士」,呢匹馬實力唔差,但閘前脾氣大,搞到入閘後非常煩躁,告仔手足講番,今季響從化試閘脾氣一樣咁大!買呢匹馬真係似買大細,但睇番上季試過落山爆上嚟而最後僅敗入位,表現唔錯架啦,今次排一檔出馬又少,計數點都信得過。
第二場「印印腳」係五班馬,本來就話唔會賭五班馬,但今次點都要揀佢,因為睇番佢開鑼日嗰場,雷神騎得好有心機,最後力弱跑第四,但以佢千二磅大馬嚟計,嗰場最多得七成多狀態,表現唔錯啦,熱過身後狀態去到九成,谷中係主場,加上排檔又好,縱然五班馬失準到暈,但馬夠勇,賊船都要搭番次啦喂!
最後要埋第七場「興爾」,高價馬血統顯赫,點知係流料,表現差到得人驚,好彩仲響谷中一哩搵到條出路,集中跑呢程都叫合理。今季轉投韋廄,呢位練馬新丁已經替兩匹處女馬開齋,睇嚟都有啲工夫仔,試閘拍「發財寶」同試走勢從容不迫,態況肯定靚,隨時係韋達第三匹處女頭馬啊!
-------------------------------
想唔想知自己財運、事業、愛情會點?參加《玄機解馬》節目,可免費畀美女堪輿學家唐碧霞睇八字、睇相指點迷津,快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此