港股前日大升後，噚日仲幾強勢，恒指收19356，再升90點，期指升唔足，只升47點，收19266，低水又擴闊至90點。
噚日個市，郁咗啲大價股（即係一二線），又繼續大郁啲細價股（即係八九線），中間（三至七線）嘅以國企為主，好多都係「吽吽豆豆」，成個市分開三截嚟玩，各適其適。
10大上升股全部係股仔，但成交絕對唔失禮，第3位嘅民豐控股（279）成交3.12億元，第9位威利國際（273）2.62億元，第10位長盈集團（689）2.49億元。民豐中途停咗牌，有大搞作；威利剛起動，長盈則破位，個勢最靚，大型頭肩底形態已確認，照度上去，短期上升目標係0.52元。
仲有一隻消息傳得好勁嘅首長科技（521），亦要留意。首科收0.77元，升0.10元，升幅15%，排大升榜15位。

個多月來，首科在0.50元至0.71元間上落，噚日一支大陽燭，升破徘徊區的頂部阻力，仲有近2500萬股的大成交支持（比前日大增6.4倍），動力強勁，短線上升目標指向1.03元。
新加坡政府旗下淡馬錫係首科股東，未聽過？事緣首科在去年以換股方式，全購創業板公司中程科技，每3股中程換兩股首科，中程大股東「MegaStart」及「新加坡科技電子」轉而持有首科股份，「新加坡科技電子」就係淡馬錫旗下企業。
市場有消息，話首科股權會有變動，現時首長四方（730）持有28.5%，而長江實業（001）則持有7.2%，MegaStart名下有17.6%，股權變動，係現時股東增減持，還是另有第三者？
首科業務多元化，其中主要的光掩膜業務雖仍有虧蝕，但情況已改善，預計07年整體表現可望轉盈。首長系重整，消息指首科會率先起動，出售非高科技業務，並安排注資，以集中發展高科技產業。股東若有變動，好大可能係同重組轉型有關。