2月避過美股股災，今個月初又輕倉渡過調整，炒股20年的Alex自言摸索出找到一套穩陣贏錢的方法︰順勢而行。惟他自問倉位回報率並不突出，一年最多四至五成，但勝在坐得舒服，可以贏到落袋。踏入40歲的他其實在股票市場交足學費，回望20歲出頭衝入股票市場，無技巧無經驗無認識，短短兩三年賺到過百萬，實現散戶們的FF後極速打回原形，痛定思痛調整心態扭轉敗績。

「我玩美股兩年超級順，基本上冇輸過錢，不斷贏。」講得口響的Alex，倉位的一半分別是納指100 ETF（QQQ）及由女股神Catherine Wood主理的科技股ETF（ARKK）。他說︰「我打開QQQ張圖已經知，真係冇點跌過，除了2月之外，但我避過。」另一半是熱炒的正股加上小部份期權。

有智慧不如趁勢

經常在Facebook分享投資心得的Alex早在2月22日美股展開大跌市之際已經清倉，他認為投資最重要是順勢，揀股方法並不複雜，找大漲小回格局，呈現上樓梯形態的股票。沒有跌穿上次調整嘅V型底就長坐，揀的都是有基本因素支持及有基金買的熱門股。

對他來說炒股不怕「高追」亦不怕有泡沫，反而極為反對博反彈、撈底或追落後等方法，「呢啲逆勢投資會令到大家遇親大調整或股災一定輸錢，曹仁超都講順勢而行，有智慧不如趁勢。」當然需要市場配合，他認為美國很多有質素的公司股價平穩向上，當然亦都會跌，亦都有震倉的時候，但震完重上的股票不計其數，就算用放大鏡睇納指過去10年不過是「陰你」幾次。

然而不禁要問的是，事後睇到股價升完之後，才會知道自己是在順勢的一方，高追遇調整損手的散戶每日不計其數。Alex認為應該要捨易取難，如果睇唔清市場走勢就應該小注或者直頭收手，直到一個「抵做」的時機出現。例如大市重現升勢，在上次調整的支持位附近開始買就是相當抵玩的時機。

同時他指出要改善戰績就要避開逆勢的想法，「升緊嘅Tesla唔買、Square唔買、贏嘅股票唔買，逆勢派升到天價回少少就買」，往往到股災時就會輸大錢。

贏過百萬又輸返晒

炒股20年有上述的一番領悟，全因為在港股贏完又輸過，每次贏到錢都袋不穩。Alex憶述自己2003年大學畢業，工作一年儲落一嚿錢開始玩股票，「開頭買啲穩陣嘅股票，深圳高速公路（548），人生第一注，揸幾個星期就升咗10幾%，當然好開心，當時市好到哪怕係唔識，都可以贏多輸少。」

市旺贏錢開始心雄膽更大，覺得自己本小，於是走去恒生銀行做私人借貸10萬元，擺入孖展戶口。當時息口並不低，不過有錢贏就照炒，開始大大注買股票、窩輪、期權。

2007年最誇張的時候，試過揸70萬元窩輪，他一面解釋指如果窩輪買不中升跌，可以在兩星期內輸晒。當時他只是一個月入萬元的華資行分析員助理，手上的賭注是幾年的年薪。

當年無知之下順勢坐上港股直通車，及後港股大奇蹟日後衝上33,000點，Alex買中邊，「當時揸call輪揸得好渣， 唔識照樣衝去玩，銀行、內銀、地產股，隻隻都每日升幾成」，造就人生第一桶金，收穫過百萬元。「當時好開心，20幾歲有成百萬cash，仲因為賺得多錢，直接辭職全職炒股。」

故事的後續只要打開恒指圖望去2008年就見到，Alex將所有盈利原銀奉還，輸清光。及後重新搵工在證券行做經紀，股市上來來回回，每2、3年股災大調整就白做，經歷一輪心態調整，似乎在轉投美股市場上找到方法。

掌握理財智慧 感受生活品味

investMAN全新網頁 優雅登場

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道，深入社區，踢爆權貴，即Like蘋果專題及調查組FB專頁！