一場感人、浪漫嘅婚前派對，相信大家依然為阿嬌(鍾欣潼)同台灣「醫學王陽明」賴弘國送上無限祝福，希望阿嬌得到幸福，阿嬌前晚先同老公蜜月返港(新聞連結： https://bit.ly/2LsyUO5 )，見到阿嬌面上一臉幸福，但今早阿嬌嘅心情就180度嘅轉變，佢突然喺ig度貼咗一張電影《Lady Bird》嘅截圖，圖上嘅對白係：「因為你只考慮自己，不考慮別人」，阿嬌嘅留言係：「#看到一個我好尊重嘅朋友覺得我冇需要佢我個心好難受 #點解唔可以放低無謂嘅情緒好好地祝福呢 唉...」

阿嬌言語間，睇得出佢係有傷心同難受，好多網民見到阿嬌唔開心，就即時留言安慰阿嬌，仲有網民柯南上身，估吓邊個朋友令到阿嬌唔開心，當中有人就估係台灣藝人楊丞琳。

咁點解會係楊丞琳呢？是咁的，阿嬌於上月26日喺美國舉行婚前派對時，身為阿嬌好友嘅楊丞琳就不斷被網問到點解佢冇份出席，當時楊丞琳當時爆seed咁回覆網民：「請你們不要一直問好嗎？而且很重要嗎？」，而當楊丞琳轉發阿嬌婚照送上祝福時，再有網民質疑佢同阿嬌咁好朋友，點解冇份出席呢場盛宴，當時楊丞琳咁回網民：「我被邀請參加的不是美國這場婚宴，而且很重要嗎？不能只祝福她嗎？」對於楊丞琳的回應亦被網民解讀為「嬲豬」。(新聞連結： https://bit.ly/2sGdbv9 )

就係咁，今日就有網民估係楊丞琳令到阿嬌唔開心喇，但阿嬌為免多生事端，佢好快就回應網民指：「當然不是！」另外，阿嬌亦叫網民不要再估佢啲好姊妹，不過阿嬌喺留言中又回覆一名網友指「本來無再諗 但係見到佢個hashtag就好無奈之嘛 哈」。

精選娛聞，喺晒《娛果》
http://fb.com/appledailyent