鄭希怡（Yumiko）早排喺好姊妹應采兒（丁丁）嘅泰國生日party上，影相跣腳由高處墮下頸部受傷，做完手術執番條命。Yumiko返港休息後，傷勢已好得七七八八，佢噚日同丁丁去咗海洋公園，呼籲拒絕食魚翅，為環保出力。講到Yumiko受傷，丁丁講笑話：「事後發現Yumiko雙腳比一般人細，所以容易跌親。」

感激男友

Yumiko噚日除低頸箍，見佢頸後貼住去疤貼，但佢依然唔可以擰頭，要用身體遷就，Yumiko話：「呢個月冇乜點郁，望人好似四哥咁。」Yumiko仲話：「有三、四節頸椎移咗位，家裝咗四個螺絲固定。」Yumiko話醫生家批准佢做簡單工作，但呢個月已推咗三部戲。
Yumiko又話今次因禍得福：「好多謝Andy（男友梁學儲）喺我咁唔靚嘅時候話娶我。」Yumiko計劃喺香港擺酒，不過最快要出年年尾。另外，一向火爆嘅丁丁老公陳小春，噚日喺微博留言話有英國選手喺奧運跳水賽重跳，結果攞咗銅牌，小春覺得大會有欠公平。