眾所周知，學民思潮召集人黃之鋒係香港公開大學學生，但原來喺大媽眼中，之鋒係香港大學學生。話說八方同事噚日下晝喺港大同之鋒做訪問，突然有位操廣東話嘅「港版大媽」走近，批評之鋒收黑錢，仲話佢係「香港大學嘅恥辱」。面對大媽挑機，見慣風浪嘅之鋒自嘲：「我都想係香港大學嘅羞恥啊大佬！」佢係facebook分享事件自我抽水，獲1.3萬網民讚好。
噚日之鋒同《蘋果》做緊訪問，嗰位大媽突然走埋嚟念念有詞，話之鋒「收黑錢」、「搞亂香港」，又抽出手機狂拍之鋒。見之鋒唔理佢，就再調高聲量鬧佢係「香港大學嘅恥辱」、「整臭香港大學」、「廢人一個」。

八方同事勸大媽唔好騷擾採訪工作，以為就咁了事，點知訪問尾聲就有港大保安話收到有人投訴，走埋嚟了解事件喎。之鋒事後喺facebook分享事件，講咗句「其實……我都想係香港大學嘅恥辱」。一眾網民呼籲大媽要做咗功課先，部份留言亦相當精警，「首先……你要……有得讀港大……」、 「無知都幾恥辱」，令花生指數急升。之鋒慨嘆，最近3個月出街都未遇過同類事件，點知喺港大做訪問反而遇到。其實喺港大讀書緊係令人嚮往啦，之鋒都係得個諗字，八方覺得之鋒不妨搵嫻姐幫幫手，開記者會要求馬斐森校長酌情考慮畀之鋒入讀港大，話唔定夢想成真。

李八方
mailto:[email protected]