被封為幸運之星嘅岑麗香今日配戴閃閃珠寶現沙田馬場賽馬日，今日咁凍，問到香香佢老公強強有冇畀溫暖你？香香竟然話：「好期待。」原來佢get錯咗大家嘅問題。後來佢自爆今日係兩夫妻結婚一周年紀念，唔怪得衝口而出話好期待啦。

香香話：「做完活動會飛返去加拿大，穿越時空返去會合老公，好感謝時光。穿越時間係最好禮物，會等待一個surprise!」仲好有信心咁話：「相信老公會有準備！」

答番頭先強強有冇俾過溫暖你？香香話：「個個女仔都鍾意被抱嘅感覺，我都係普通女仔。」香香從來冇試過織溫暖牌畀老公，「一來要好多時間，二來驚會好多窿窿，不過相信真係嘅話，老公都會著。」香香又讚強強好有心。

莊思敏今日同細妹莊思明（Lisa）、莊思華合體到馬場，女仔真係特別抵得凍，佢哋一樣無懼寒冷天氣，少少性感現身。講到今年聖誕同新年願望，莊思敏自爆每年嘅願望都一樣：「我要爬細妹頭搵到個好男人結婚，哈哈哈哈！」佢哋三個會同屋企人返馬來西亞慶祝：「以前好多節目，可能個人大咗，o依家大時大節，反而想同屋企人過。」

更多娛聞，喺晒《娛果》
http://fb.com/appledailyent