巴塞隆拿最近成為球迷熱愛球隊,貪佢哋好似以前「細哨」當打時,前邊入得波多,讓幾多都殺得起;不過周日作客奧沙辛拿,小弟就刻意求冷,博26倍「主/客」。
巴塞西甲5連勝,盤路亦亮麗,上仗聯賽補時階段憑耶耶托尼建功,贏馬略卡3:1,也為捧場客開出「主勝」,基本上同巴塞搞對抗都冇好過。但近期巴塞後防慌失失情況又出現,門將域陀華廸斯又有甩手,馬田卡沙利斯、碧基有潛質但唔算穩陣,丹尼爾又輕出,近兩場聯賽巴塞都失波先,好彩攻力夠可以反勝。以奧沙辛拿之前主場可以大炒基達菲5:2,有權爆冷上半場偷雞領先,冷選半全場「主/客」。