大隻佬周文健（Michael）昨日現身天后為有份投資的生煎包店宣傳，Michael今次跟朋友們合資150萬買特許經營權做，下月再在旺角開多一間。對於蕭潤邦（Oscar）同樣經營生煎包，他說：「知道呀，大家味道唔同，唔通開咗麥當勞，其他人唔可以賣漢堡包，畀多啲選擇人哋。」
相隔十八年再拍港產片，周文健月底接拍翁子光導演新戲，跟梁朝偉、郭富城同譚耀文演四大探長，他自言人成熟了、俊朗兼有人生閱歷，應該會演得更好。
據知戲名叫《全球追緝令》主線講述四位探長出走後的心路歷程，跟之前《四大探長》的大量動作場面稍有分別，對人性描寫較深刻。
《全》片四大探長的角色，分別由梁朝偉飾演藍剛、郭富城由《五億探長雷洛傳II之父子情仇》入面做雷洛兒子，今次轉做雷洛本人（即呂樂）、周文健和譚耀文分別飾演韓森、顏雄，許冠文都有份參演，將扮演ICAC高層。

演員酬金近億

電影下月於內地拍攝，下星期試造型，預計投資2.5億元，單是演員酬金已差不多1億元。記者昨致電導演翁子光，他以短訊回覆：「不好意思暫時無可奉告。」
至於有關舊愛關淑怡襲擊新聞，周文健指兩人起碼二十幾年沒聯絡，當得知舊愛認罪並留案底罰款二千元，他戲言：「應該罰二十萬冇案底，可能有人會搵佢拍打戲。」
採訪：馬建華
攝影：陳慧安