啱啱喺韓國百想藝術大獎上捧走最佳電影嘅《逆權大狀》，將於今個月19號喺香港上映。韓國男團帝國之子成員任時完，喺片中飾演被屈睇禁書，而違犯了國家安全法嘅學生，而宋康昊就飾演正義律師，瞓身幫佢辯護。

片中有多場任時完被嚴刑逼供嘅場面，見佢皮包骨，原來佢為此而激減18磅，得番110磅。

任時完接受本報訪問時話：「最辛苦係拍攝被公仔麵啲湯潑面，雖然眼同鼻都用保鮮紙遮住，但都有湯入口，當時我減緊磅，真係好想食公仔麵。」佢又多謝宋康昊過兩招指導佢演戲，令佢演技有進步。

提到佢最近亦有演出韓劇《Triangle》，問佢同JYJ成員金在中合作成點？佢就話金在中前輩好照顧佢，成日一齊食飯，變得熟絡咗。

至於佢年前同帝國之子隊友來港開騷時，曾唱張國榮嘅《無心睡眠》，咁究竟佢係咪哥哥嘅粉絲？佢就話父母好鍾意睇哥哥啲戲，自己都由細睇到大，有好多美好回憶，本身亦覺得哥哥嘅歌聲好正。