今屆落選港姐工藤佑采因為被指喺節目直播期間，指「黑面」、「hea跳」，連日嚟喺ig留言，日前黃心穎話認為工藤黑面態度有問題，仲話對佢徹底失望，結果工藤喺ig開火狂轟(新聞連結： https://bit.ly/2MM1q2u )。

噚晚鄭嘉穎喺銅鑼灣出席電影《L風暴》嘅慶功，講到今年港姐嘅是是非非，唔知老婆陳凱琳返屋企有冇再討論論呢？嘉穎話：「佢話嗰啲心水都中晒，有冇講黑面？邊有人黑面黑得過我？黑面我出名㗎喇！仲有人出名得過我？」之不過你出鏡好少黑面喎，嘉穎就話：「我唔係㗎喎！我都係睇心情㗎喎，有乜嘢話出唔出鏡㗎？你識我廿幾年，黑就黑㗎喇！」

講到落選港姐工藤Hea跳兼黑面，嘉穎話：「咁我又冇睇喎，我唔係好清楚個情況，所以唔評論，不過我只可以咁講，如果要做番自己性格，要需要一段時間，唔係唔得，不過要人哋清楚你嘅唔係一朝一夕，要好連貫，唔好周時變，一時黑面一時又笑，要連貫番你個人，要真實，好似我咁過廿幾年，觀眾就接受咗，當然有啲嘢係要承受。」

唔知啱啱新婚又會唔會令心情有轉變？嘉穎話：「我都係睇心情，如果你要做呢樣嘢，就要承受番個後果，自己揀喇！當然我唔會對住太太黑面，都係對啲唔鍾意嘅人先會黑面。」

之後講到日前同《鐵馬尋橋》啲兄弟姊妹補食生日飯，嘉穎話：「我哋每年都會聚一聚，好難得可以齊腳，不過太太有啲唔舒服，所以咪冇去。」

精選娛聞，喺晒《娛果》
http://fb.com/appledailyent