【本報訊】財爺大增今明兩年私樓供應，投資者暫持審慎態度。見盡樓市起跌，在香港持有過百個單位收租，人稱「倫伯」的倫志炎淡定過抬油，他說：「樓市起起落落，睇到好多次啦，六七暴動、亞洲金融風暴、禽流感，樓價試過低於建築成本，最終樓價和恒指都是向上升。」他相信，儘管政府增加供應，但吸取過往教訓，不會推冧樓市，相信樓價會平穩發展。
年逾八旬的倫伯稱，當年港人一家幾口「屈」在幾十呎唐樓，今日港人追求更大更多空間，所以供應增加，香港仍然食得起，「如果用我細路嗰陣嘅標準，𠵱家香港嘅樓，真係多得滯！」再者，發展商高價投地，反映睇好後市，因此不太擔心樓市再有暴跌的情況。

「多供應都係唔夠用」

他稱，樓價暴跌並非好事，「唔怕米貴，最怕運滯」，一旦經濟基調出現問題，樓價再平亦無人敢買，希望政府不要製造樓市硬着陸，讓樓價循序漸進地發展。
專吼凶宅，目前持有十多個單位作長線收租的伍冠流指出：「遠水不能救近火，供應唔會一變就變出來，要等㗎嘛！」他相信樓價不會跌好多，「成日都話多供應㗎啦，但多供應都係唔夠用，始終需求好大，你睇，仲有咁多人住劏房！」
伍冠流稱，政府提出的供應屬長遠計劃，不需要因此而沽貨離場，「經歷過咁多風浪，唔會即刻跌嘅，慢慢睇定下先啦」，對於後市，他坦言不樂觀，「跌嘅機會大，短期唔會有意欲入市，除非真係好抵，低市價一成、半成個啲？唔諗喇！」