不願公開姓名的《蘋果》讀者投訴稱,她於今年4月27日從網頁得悉一間名為「柔之美藝術」美容公司,提供柔眉手術,較傳統繡眉和紋眉先進。
她次日到銅鑼灣耀華街美容公司做柔眉,單次費用1,900元。經職員畫眉、「掹眉」修整眉形後,她合上眼睛,由職員用附有針頭的儀器在其眉上「拮入」顏色。
她說,手術後兩天,眉上結痂部份脫落,眉上顏色也「甩晒」,她致電美容公司投訴,職員稱,「可能第一次上唔到色,不如你再上嚟,加多千九蚊,我同你轉三千八蚊嗰個,一年做無限次。」
眉上結痂顏色「甩晒」
因每次柔眉需相隔一個月,讓皮膚「唞唞」。她遂於上月29日再加1,900元做第二次柔眉,做後數天,眉上結痂甩脫後,眉毛上仍沒有任何顏色,與未做前沒分別。「我堂眉喺柔眉前要掹眉,掹剩半條,重係一邊長一邊短,好肉酸!」
她再向美容公司投訴,職員稱她皮膚較薄所以難上色,着她60日後再做,「做多幾次應該會上到色」。
她不滿地表示,「佢哋叫我暫時用眉筆畫眉,我就係唔想日日畫眉先做柔眉,如果係咁,我使乜畀成三千八蚊做柔眉呀?我有朋友整兩次已經上色,重可KEEP(保留)起碼半年。
做咁多次皮膚頂唔順
我接受唔到做多幾次,每次都會痛,會流血結痂,做咁多次,我怕我啲皮膚頂唔順。」
「柔之美藝術」負責人鍾小姐回應本報查詢時表示,投訴人因為皮膚較薄,所以較難上色,至於何以兩次手術仍未上色,她稱,「每個人情況都唔同,有啲好快就上色,有啲就要做多幾次,總之好難講。但佢呢個手術係全包,只要佢肯再上嚟整就應該會有效果喇!係佢太緊張啫!」(○六○八○二七)