美國高球巡迴賽旗下嘅二級聯賽Web.com Tour喺周三宣佈，NBA球星史堤芬居里（Stephen Curry）獲邀出戰艾莉梅精英賽（Ellie Mae Classic）！比賽將於8月3至6日舉行，而「咖喱仔」會以業餘球員身份、以贊助商外卡出戰。

咖喱仔對自己首次出戰職業高球比賽都好興奮，佢仲話：「我一直都鍾意打高爾夫球，可以參加PGA認證嘅賽事、同職業高球手同場較量，對我嚟講係美夢成真。」咖喱仔早前更同NFL新英倫愛國者嘅星級四分衞布拉迪（Tom Brady）一齊打波，唔知係咪為呢項比賽做準備呢？