北京地產商SOHO中國（410）早喺03年已經打算來港上市，咁啱市況轉差，拖咗4年終於成功掛牌，集資過百億元。董事長潘石屹同總裁張欣一直都係夫妻檔搞間公司，噚日出席上市儀式，一個着黑一個着白，襯到絕，唔睇背景，仲以為佢哋影結婚相。
嗱，華華好多女性朋友都話，他日嫁得出，一定要保持經濟獨立──「我嘅即係我嘅，老公嘅都即係我嘅」，咦，呢個應該係經濟獨「擸」噃，你咁諗，都咪使旨意嫁得出。哈，估唔到世事無絕對，呢個經濟獨「擸」嘅夢，喺張欣身上實現。

老公送股恨死隔籬

潘石屹同張欣兩公婆出晒名恩愛，本來各自持有SOHO一半股權，05年底，潘石屹以饋贈方式將自己嘅股權送晒畀老婆，張欣再將全部股權放入一個信託，精髓係，佢係呢個信託嘅唯一受益人，即係間公司基本上係佢嘅。
SOHO噚日收9.55銀，成間公司市值477.5億銀，張欣揸住公司66.48%，換言之，佢已經有317.4億銀身家。
前日同華華茶敍時，佢已經大讚老公唔煙唔酒唔賭唔炒股，係個百分之百好男人，今勻老公仲將幾百億身家交晒畀佢管。唔知潘生仲有冇兄弟有佢一半咁好仔，可以介紹畀華華嗰啲嫁唔去嘅姊妹呢呵？
啱啱做咗中國第七大富豪嘅張欣，有錢有老公錫，固然令人羨慕，但華華更羨慕另一個張茵──玖龍紙業（2689）嗰個。玖紙今年股價急升75%，令最大股東兼主席張茵進賬唔少，張主席揸住近30億股玖紙，噚日收市報23.5銀，身家厚達702.7億銀。
不過，噚日公布嘅《福布斯》10大中國富豪居然無冇咗張茵，舊年佢係中國女首富，今年10大不入。明明以噚日收市價計，張茵嘅身家多過另一個張欣，唔知《福布斯》用邊日嘅收市價計身家呢？
mailto:[email protected]