身為特首,唔搵班猛人喺身邊吹水,又點顯示自己高瞻遠矚呢?煲呔噚日話「經濟機遇委員會」要及時評估金融海嘯形勢,籌謀對應之道,同埋捕捉新機遇,提高香港國際競爭力;吹到咁大,八方都要佩服佢忍得住唔笑,成員之一施永青好老實,話自己曾婉拒加入呢類口水會,不過煲呔堅持,佢推無可推先應承。
煲呔盛意拳拳,施永青卻大潑冷水,認為市民千祈唔好對呢個委員會期望過高,以為成班人坐埋就係「指路明燈」,絕對係不切實際。文化人胡恩威則話,經濟與文化不能分割,佢唔知自己識唔識高深經濟問題,會以一般小市民常識去講意見,至於搵到乜創富機遇,真係唔知嘞。
呢個最新成立嘅口水會,由煲呔做主席,好兄弟鬍鬚曾做副主席,下月3號首次開會,煲呔話已邀請國際貨幣基金組織亞太區主管伯頓與會,介紹金融危機對全球影響最新情況,期望月內提交方案。煲呔做咗幾年特首,好學唔學竟然翻炒老董舊橋,再搞埋啲口水會,只怕又重蹈議而不決,決而不行覆轍。
其實呢個世界「講嘢」嘅人已經夠多,不斷開會吹水,都唔可以幫到置身水深火熱嘅市民,煲呔之前話會認真思考外界批評,吸取教訓,點解改唔到高大空陋習呢?開少啲口水會,認真查找不足好過啦。
mailto:
[email protected]