大葉桔大吉大利

蘋果日報 2002/01/05 00:00


大葉桔主要嚟自東莞、惠陽等地,大葉桔主要用作拜神用,所以通常揀啲有葉「Lung」住嘅,取其有枝有葉,大吉大利,愈接近新春,大葉桔愈搶手,不過因為佢食味唔係算甜,加上都幾多核,好少食,多數擺,不過如果唔怕酸,食番粒都幾消滯㗎!
各大果檔
$3/2對
韭菜花大特賣
韭菜花通常一紮紮出售,一般售$5-$6,不過今年似乎賣得幾平,試過$3紮已經係抵食價,但家陣三蚊都唔使,而一紮都有十至十二両左右,只售兩個零,實在係抵。最簡單可以蒜茸炒,清甜而又嫩滑。韭菜花嫩滑但高纖維,便秘食佢最啱。
北角渣華道市政街市
$2.5/紮
韓國富有柿夠經濟
自從韓劇大熱後,韓國產品日漸受港人歡迎,皆因佢價錢比日貨平,就以最近至引入本港嘅富有柿為例,日本富有柿至少八至十零蚊個,但韓國富有柿十五蚊則有五個,除番開只需要三蚊個,而且質素都不比日貨差,食落爽甜,要經濟,可以考慮吓韓國富有柿,部分果檔至有咋,要試好趁手。
將軍澳新都城街市
$15/包