起底並唔係高登仔嘅專利！約會公司LUNCH Actually今年調查發現，八成港女同異性見面前，會化身起底組，最常透過追查facebook賬戶、其次用Google搜查約會對象資料。公司負責人林笑岏話未約會就起底，擔心容易對約會對象造成偏見，呼籲港女畀個機會男士，面對面睇清睇楚先好下定論。

研究喺香港、新加坡同馬來西亞訪問超過1,900人，港女愛起底程度係三個地區中最高。社運女神周澄話，如果啱啱識人、或者對對方有興趣，可能都會睇吓對方facebook了解吓，「但唔會深入起底」，怕有壓力。佢亦唔驚俾人起底，話人哋如果接受唔到就算，堅持做番自己。
黃金盛女陳淑莊則高呼冇興趣起人底，如果想知啲乜嘢，會主動問對方，唔會靠Google，事關識人最緊要交心，而且網上啲料都唔知堅定流；佢話每個人都有過去，堅信總有適當時候，可以當面講嘅。電台節目主持人彭晴亦話，冇試過起人底喎，若然需要，至多問吓身邊朋友攞料。