中秋將至，《延禧攻略》一眾演員仲會喺中秋節正日（24號），齊集馬鞍山一個商場同fans見面。咁究竟有邊個會來港呢？之前已傳出「魏瓔珞」吳謹言、「傅恒」許凱、「爾晴」蘇青三位，原來「富察皇后」秦嵐都會嚟！

唔使等到中秋節咁耐，《延禧》上述四位演員，據知將於聽日同後日分別抵港，其中秦嵐會聽晚到埗，至於吳謹言、許凱同蘇青則於後日分乘不同航班來港，都係下午機，要接機就要早啲霸位喇。

早排來港同離港都著短褲仔嘅秦嵐，諗定著邊條熱褲仔未？