何韻詩噚晚喺科學園開《On The Pulse Of 我們正在》演唱會，完騷後阿詩接受訪問，問到佢完咗第一場仲有冇驚天氣唔好，佢就話：「千祈唔好咁講，天公造美啦，我揀十二月都係比較乾燥嘅天氣。今次搞戶外騷都係邊做邊學，因為所有嘢都好貴，好似製作上嘅價錢都要兩三倍咁乘上去，剩係個舞台都要成一百萬。」問到係唔係因為咁，所以搞VIP區幫補返？阿詩就話：「又唔好咁講，都係啱啱好cover番。」但佢就話因為今次自己做製作同老闆，所以都有少少錢賺。

講到新歌《代你白頭》，阿詩就話歌詞真係噚日先收到，佢話：「寫嗰時冇諗過係寫畀邊個，只係想寫一首歌出嚟，依家就係寫畀阿妹(盧凱彤)，有呢個合寫諗法都已經係兩三個月前，之前諗住自己寫，但寫極都寫唔出，轉過唔同角度，最後只係寫到副歌部份，我畀咗Wyman，叫佢如果用到就用啦，用唔到就可以改晒啲詞，最後佢好似大學生幫小學生咁樣，冇改我嘅嘢，就變到依家呢個版本。」

精選娛聞，喺晒《娛果》
http://fb.com/appledailyent