創業從來不是易事，特別是與互聯網相關的行業，業界流行一句說話：「high tech揩嘢，low tech撈嘢」。電召車平台Lalamove的創辦人周勝馥（Shing）感受尤深，他指香港創新科技startup要面對三大困難。

科網初創企業往往是一個燒錢的遊戲，首要任務是融資。雖然香港是一個國際金融中心，經濟活動活躍，但Shing認為，作為一個香港startup去融資特別難。他解釋，「風險投資就係一個尋找獨角獸嘅遊戲」，因為香港在科技初創企業方面沒有特別成功的例子，投資者未必願意冒險投錢給本港startup。他認為，投資市場就如股票價格，有升有跌，14年期間大家非常睇好互聯網行業，15年的融資活動則出現「天與地」的變化，大家都不睇好行業發展，當時陸陸續續死了不少科網公司。

第二，亦是最重要的創業絆腳石是香港本土市場細，難以達到規模經濟。「香港係一個幾特別嘅地方，但特別喺互聯網就變咗一個disadvantage」，Shing以Lalamove為例，要由香港複製業務到大陸，要面對的tech唔同，要請嘅人唔同，法律又唔同，需要一系列的本地化改變，情況就似「重新再start間公司咁」。他指出，如果一間初創公司由深圳開始，做得好之後，經營模式很容易就可以複製到去廣州；又或者由三藩市複製到紐約都較簡單，因為兩個城市的文化、法制、營商環境大同小異。

香港缺乏科技人才一直為人詬病，亦成為本地創新科技startup的一大阻力。首先大學的IT相關學科一向被視為「水泡科」，出到社會又有「炒人先炒IT」的不明文職場定律，實在難培養IT人才。Shing直言，近年情況有改善，但對startup而言，「啲人覺得會執苙，少啲人會願意投身startup呢個行業。」

記者：曾木秀

掌握財經生活資訊，即Like「蘋果ATM」fb專頁啦！
http://fb.com/appledailyatm