香港小姐嘅質素雖然每況愈下，但話晒每屆都有唔少新聞炒作，點都吸引唔少市民坐定定捧場。前晚仲因為選港姐，搞咗單《民主歌聲獻中華》嘅翻版。有市民向八方投訴，話上周六晚喺超五星級嘅中環麗嘉酒店中餐廳包房食飯兼睇港姐，點知冤家路窄，隔籬房傳來一把類似「煲呔」嘅聲音，喝啲部長過嚟叫佢哋唔好嘈！結果搞到連港姐頒獎都睇唔到，真係谷鬼氣。
單嘢係咁嘅，話說前晚有個何姓市民投訴，佢哋十幾個人去咗麗嘉酒店嘅麗嘉軒食晚飯，幫其中一位仁兄慶祝生日，順便開電視睇港姐，點知睇到胡杏兒出嚟嘅時候，突然聽到隔籬房有把類似「煲呔」嘅聲喺度投訴，跟住有個部長走入嚟，同佢哋講，因為有高官喺隔籬房，叫佢哋唔好咁嘈喎。
阿何生話，佢哋都明白事理，馬上熄細電視聲，但餐廳竟然搵個侍仔企埋入嚟佢間房監視，同佢哋一齊睇港姐！後來仲有個部長入埋嚟，改口話包房係唔包睇電視嘅，一定要熄電視，跟住仲打開道門想趕客咁款，既然係咁惟有埋單走囉，慶祝生日梗係要講吓笑啦，唔通合臭口咩？如果煲呔或者高官真係咁驚嘈，咪返禮賓府食囉！

政府否認煲呔曾光顧

八方覺得，呢個市民講得都幾合理，唔係刁民；咁餐廳梗係嘈啦，既然有部電視喺度，睇港姐又有乜問題？不過麗嘉酒店、酒店職員同政府新聞處都話，煲呔當日係冇嚟過麗嘉。酒店發言人話，如果煲呔同高官嚟，酒店職員一定知，但噚日冇人察覺有要人駕到，而八方問餐廳伙記，都冇人話見過煲呔，仲話包房食飯真係唔包睇電視，但當晚的確有人喺包房度，將電視聲扭到好大聲。
官方否認，但何生再三同八方講，佢聽到嗰把聲的確係煲呔，而且啲伙記的確同佢哋講，有高官喺度唔好嘈！呢單羅生門，八方真係唔識判斷，如果有市民當晚都喺麗嘉酒店，見到有邊個高官喺麗嘉軒，歡迎隨時向八方報料，睇吓有冇辦法搵到係邊位，唔畀人睇電視咁霸道？