佔中三子同大批民主派人士，今午3時突然齊集中環終審法院外，現場除咗出現大批示威標語，佔中發起人戴耀廷更喺人群中高喊「去飲嘞！」莫非佢又準備發起新嘅佔領行動？大家唔使緊張，其實戴耀廷只係出席社民連副主席周諾恆（Jaco）同工黨張超雄議員助理袁慧妍破格嘅街頭婚禮啫！

為咗慶祝社記副主席大喜日子，一班社記成員一早印咗唔少包括「沒有結婚，哪有改變」、「沒有民主，何來美好婚姻」、「爭取全民退保，你我白頭偕老」等搞笑標語贈慶。唔講唔知，促成呢段良緣嘅「紅娘」，竟然係現時民主派召集人毛孟靜。事緣當年未做議員嘅Miss Mo向《蘋果日報》報料，指當年仍係政治素人嘅Jaco，喺中聯辦外示威，咁啱《蘋果》安排咗當時做記者嘅袁去採訪，兩人從此結緣，今日更進入人生另一階段。

佔中三子、社民連「長毛」梁國雄、工黨議員張超雄等都先後祝福新人。佔中三子之一嘅陳健民話，神學家潘霍華（Dietrich Bonhoeffer）喺二次世界大戰，同教會及希特拉對抗期間，人生低落時候都出現愛情，反映有心投入社運嘅人，心底一定有希望，「有希望嘅人至會結婚」。陳健民其後仲「禿鷹」上身，祝福一對新人時高喊：「你哋無做錯到！」而徇眾要求下，戴耀廷仲用返宣佈佔中啟動時嘅經典手勢，帶領大家向一對新人高喊：「洞房花燭，正式啟動」！