市場係最好嘅調節器，信奉市場機制，以市場導向為經營精神嘅刊物，應該知道物極必反，市場會反彈呢個大道理。《東周刊》就係去得太盡，過咗界，所以受到市場懲罰，與《壹週刊》競爭多年，屹立不倒，點知為咗一幅相就自動收爐，事先邊會諗得到㗎。
以左丁山嘅愚鈍市場觸覺，較為正經嘅報刊，捱打咁耐之後，有望可以搶番部份市場佔有率。香港人點都有三分鐘熱度，家長為咗子女教育，中產階級為咗以示正經，今後會睇番一啲正氣刊物、溫馨故事，當負資產氾濫、失業日增、世界恐怖事件無日無之之際，你我都唔肯再睇啲悲慘故事，血淋淋嘅斬殺、自殺跳樓故事啦，不如睇番一啲美麗人物、美麗故事，藉以麻醉自己，發番個好夢！
市場導向主義，講究隨時調整營運方向，千祈唔好一成不變，過往靠豔照黃賭毒踢爆私隱故事賣書嘅雜誌，係時候反省一下嘞。