眾矢之的嘅鼠王芬，道歉後都唔敢貿然蒲頭，噚日終於反擊，十幾個市民噚日喺立法會外拉起寫住「梁美芬議員我們支持您到底」橫額，又拎起鼠王芬肖像，向鼠王芬獻花，鼠王芬話好感謝支持者遠道而來中環支持佢，所以同大家合照留念。
不過好奇怪，呢班「支持到底」嘅fans，同鼠王芬合照時，個個都用要紙遮面，似乎好怕真面目曝光，如此舉動，古怪得嚟有啲嘢。如果認為鼠王芬要支持到底，大家撐佢應該光明正大理直氣壯，點解要遮遮掩掩呢？唔通支持鼠王芬，係唔見得人嘅事？冇理由喎，facebook「我相信有10萬人不想梁美芬再當選議員」群組，加入者不足3萬人，好少啫。