今年七一跑馬撞正星期六，對一班外籍騎師嚟講，仲有另一重意義，皆因星期日（7月2日）冇馬跑，加上下星期三（7月5日）亦冇夜馬跑，莫雷拉、潘頓等有米騎師已經卜晒機票同酒店，準備跑完明午（7月1日）賽事後就外遊充電。

明午第七場香港回歸盃，似乎係呢兩位騎師單打獨鬥嘅格局，莫雷拉騎「劍斷浪」力爭季內第三Win，潘頓亦繼續騎「赤兔寶駒」，後駒上仗轉投方嘉柏馬房後初出，即喺1400米追入亞軍。

最令人深刻嘅「赤兔寶駒」喺直路難以策騎內閃，但追勢依然好勁，潘頓今仗賽前話自己已有獨門方法操控隻馬，反而剛喺谷草夜戰（28日）起孖嘅方仔，仍然對匹馬好有保留。

雖然「赤兔寶駒」上場排12檔，沿途走三、四叠都照入Q，照計今場抽到第10檔都應該可以放心，但方仔偏偏最擔心就係排檔，仲話排位抽籤前，求神拜佛希望可以抽到1至4檔。

可惜事與願違，方仔解釋「赤兔寶駒」目前走規仍有問題，預計隻馬下季轉五歲後先可望會糾正到，上場喺最外檔起步都有好表現，並唔代表今場都有同一形勢同走勢，但長線嚟講，隻馬必會企穩喺100分以上。