賭王四房孻仔何猷君迎同新加坡富商、西甲華倫西亞班主林榮福大女KimmyLin撻着唔夠一個月，即拍拖密密見，之前喺澳門蹺實shopping，猷君前幾日又飛去新加坡探Kimmy，女友仲幫佢開P預祝生日。

以為Kimmy同猷君預祝生日，正日就留返男友喺香港同朋友屋企人過，原來Kimmy又搞驚喜，噚日飛嚟香港人肉賀壽。大概9點半，猷君同Kimmy及家姐超盈齊齊喺中環置地廣場離開，據知佢哋喺樓上嘅ChinaTang嘆中菜，佢哋一見記者即表有點錯愕，猷君更顯得有點怕羞尷尬彈開，而Kimmy低頭行走近「未來姑奶」超盈隔籬。

記者上前問Kimmy嚟幾日，會同猷君去邊度玩，Kimmy都冇出聲，但全程冧笑，而猷君就全程講電話，不過行近玻璃門時，都風度地幫女友開門，三人一齊上了七人車而。Kimmy刻意先上車，之後超盈就做「電燈膽」夾喺同猷君中間坐，臨走前，超盈仲同記者講Byebye。

眾人應該再去夜場繼續慶祝，見Kimmy喺snapchat擺咗條片，見到佢、同猷君、超盈同嚴紀雯跳舞，而猷君同Kimmy跳舞時，Kimmy即舉V，而猷君就有啲醉意，應該玩得好盡興，但今次佢哋應該想保持低調冇互postIG，而Kimmy只擺咗張同嚴紀雯嘅合照。