當年今日
關於我們

【智取大市】內房鬆綁意義大(晉佳)

蘋果日報 2018/12/20 18:59

晉佳港股

美股近排跌到反艇,A股都有準備碌落山之勢。近排避險股接連破頂,繼而醫藥、教育股破底跌。美國加息後,輪到周期股掟貨,拋售力量無限復活。熊市當中,避險股逆市跑贏一段時間後,多數都係整體大市唔理避唔避險一齊跌,以下跌動力嚟睇,月線圖保歷加通道下軸約24,300點不會是底,但留意,歷史上恒指跌低到偏離下軸係中線撈底好時機。
上期先以估值去講港股,除非樓價大跌,恒指護城河係市賬率1倍,即估計明年3月業績期後大約22,000點。
問題係,樓市爆唔爆。凱滙平啲搶餐飽,香港樓市準買家信心未磨滅。至於大陸,近排聽返內地業界人士都形容係差,但未至於爆煲。喺呢個時候,山東菏澤取消限售,然後到廣洲、珠海,個個市政府住建局唔係派定心丸刺激市場信心,而係耍手擰頭話唔係鬆綁,驚死啲人太有信心又去盲搶樓咁。似乎暫時可以假設樓市未咁快爆煲。
睇返對上一次內地樓市調控鬆綁,就係2014年4月南寧成為全國首個鬆綁城市,之後發生乜事?上證指數同月試完2,000點鐵底,橫行唔夠3個月,再由7月起步,升到2015年港股大時代嗰期5,000點樓上!係過去10年A股唯一大炒特炒嘅時間。今次又點,至少呢個訊號有一定意義吧。
晉佳
https://www.facebook.com/advanceguy1